Manuel Murguía

Entre os historiadores galegos do século XIX, que como se ten dito acometeron a empresa de dotar a Galicia de conciencia histórica, a figura de Manuel Murguía (1833-1923) destaca sobranceiramente. El foi, calquera que sexa o xuízo que nos mereza na actualidade o valor científico da súa obra, o gran historiador do Renacemento galego. Pola transcendencia do seu labor, sempre tinguido dunha inequívoca emoción galega, debe ser colocado ao par dos grandes poetas galegos do XIX, cos que estivo intimamente ligado e aos que emprestou o seu estímulo e o seu alento. Manuel Murguía simbolizou en vida, e en certo xeito segue simbolizando aínda, o renacer de Galicia.