اللعبة

نظراً لإنه الكتاب مكتوب بالعامية , فقررت إني أكتب المراجعة بالعامية كمان ..
اللعبة باختصار هيي مراية صغيرة , بتورجيك المجتمع الي احنا عايشين فيه , بمشاكله و عيوبه وشخصيات ناسه الي حتى و إحنا مو شايفين , بتشبه بعض لأبعد الحدود.
لما تقرأ لديك الجن , رح تحس كإنه في حدا كشفك من جوا , أو حدا عم يوصف إشي إنت كتير منيح بتعرفه , مخاوفك , تساؤلاتك , وجهة نظرك لكتير أمور بتصير حوليك . وهاد الإشي الي حلو و بخوّف بنفس الوقت . هاد الإشي الي بخليني أحب الكتاب الي عم بقرأه , إني أكون عم بقرأ كإني بكتشف حالي بكلماته .
هو كتاب بسيط , في عدة قصص صغيرة , و خواطر أو اقتباسات , أو ممكن نسميها هذربات ديك الجن , وعلى الرغم من بساطتها و هبلها أحياناً , إلا إنها قدرت - معظمها على الأقل- إنها تخليني أنبسط بقراءة الكتاب .. و احبه , و أتحمس أقرأ كتاب ديك الجن التاني , مع إني بعمري ما تخيلت إني أحب هاد النوع من الكتب .